||శాస్త్ర కల (కళ )||

 క్రాంతి శ్రీనివాసరావు ||శాస్త్ర కల (కళ )||

        నిన్ననీకు
        సూక్ష్మాతి సూక్ష్మం
        నేడు
        అనంతం

        ఇప్పటి
        నీఅనంతం
        రేపటికి
        సూక్ష్మాతి సూక్ష్మం

        దూరాన్నిప్పటికే
        కాలంతో
        కాంతి వేగంతో
        కొలుచుకొనేంత దూరం వెళ్ళాం

        కాంతి వేగాన్ని
        నియంత్రించే రోజు
        కాలాన్ని
        వెనక్కీ
        ముందుకీ
        మళ్ళేసే రోజు
        మరెంతో
        దూరంలో లేదు

        అంతటినీ
        అలలమయం చేసి
        తిండి నిద్రా
        మైధునాలు
        విడివిడిగా లేకుండా
        వేరే ఏదో
        మహత్తర
        దివ్యఅనుభవం
        నిత్యం పొందుతూ
        స్థల కాల పదార్ధాల మధ్య
        సరదాగా విహరిస్తూ

        కొత్తవింత
        అంతులేని తనంవైపు
        ప్రసరిస్తూ
        ప్రభవిస్తూ
       
        చలిస్తున్న
        జ్వలిస్తున్న
        అనంత చైతన్యమై
        ప్రాణాలన్నీ ఒకటిగా
        పేరుకుపోయే రోజు
        ఎంతో దూరంలో లేదు
       
        విజ్జ్నానం వేగంగా పరుగెడుతోంది
        కొత్త వేదాంతం ఏమంటుందో వినాలనుంది
        బతికుంటే నాకూ కొత్త మార్పులు కనాలనివుంది