క్రాంతి శ్రీనివాసరావు ||తాజాదనం ||
కిటికీ రెక్కలు కట్టుకొని
హృదయం ఉదయం వైపుకు
పరుగులు తీసింది
శూర్యూడు పొద్దున్నే
ప్రకృతి కాంతకు తొడిగిన
పసిడి నగలు చూసేందుకు
అది మురిసి
నవ్వినప్పుడు
జారిపడ్డ మంచు ముత్యాలలో
స్నానం చేస్తున్న
గా్లి సౌందర్యం చూసి
తాకి తన్మ్యయత్నం చెందేందుకు
కిటికీ రెక్కలు కట్టుకొని
హృదయం ఉదయం వైపుకు
పరుగులు తీసింది
ఏటవాలు కిరణాలు
ఏటివాలు పై
ఎదురీదుతుంటే
దీర్ఘాలు తీసిన నీడలు
వెనక్కి వెనక్కి నడుస్తుంటే
గెలుపోటములు అందాన్ని
గమనించేందుకు
కిటికీ రెక్కలు కట్టుకొని
హృదయం ఉదయం వైపుకు
పరుగులు తీసింది
పూర్వ స్మృతులు మరచి
పుట్టుక తాజాదనం
అంటించుకొనేందుకు
పలక చెరిపి
బలపాన్ని
మళ్ళీ బతుకు పాట
మొదలెట్టమని
కోరేందుకు
కిటికీ రెక్కలు కట్టుకొని
హృదయం ఉదయం వైపుకు
పరుగులు తీసింది
No comments:
Post a Comment